رغدة الصوفي بكل عفوية ….
بين الحلم والحقيقة واقع تخُطُ نجاحه الالماسات بكل عزيمة واصرار .
فمن هي الالماسات ؟
هي مجموعة من السيدات اللواتي اجتمعن بقلوب صادقة حول حلم الاعتماد على النفس واثبات الذات .
فكانت فكرة انشاء صفحة عبر موقع فيس بوك لتبادل الافكار والتخطيط لانجاز اعمال مشتركة تهدف لتسويق منتجات من شأنها اعالة السيدات اللواتي يعملن بجهد وصمت .
سطع شعاع الالماست في الوسط الطرابلسي بعد تنظيم ثلاث معارض متتالية حصدت من خلالها نجاحاً باهراً من خلال المشاركة والاستقطاب الشعبي .
وبدورنا وواجبنا الاعلامي بدعم المبادرات والنشاطات لتسليط الضوء عليها تشرفنا بإجراء مقابلة خاصة مع السيدة رغدة الصوفي مؤسسة ومديرة صفحة الألماسات .
رغدة الصوفي :
“خليني اعطيك ياها بطريقة خفيفة وعفوية لانها مقابلة ودية ”
ـ من هي الالماسات ؟
ـ “قلب واحد وإيد وحدة بكل اختصار ”
ـ هل كنت تتوقعين ان تصل صفحتكم لهذا العدد الهائل من المتابعين ؟
“الحلم ما بيوقف عند رقم طبعا العدد اصبح ملفت ولكن انا ما بشوفهم متابعين انا بشوفهم محبين واصدقاء وداعمين ولولا وجودهم ودعمهم ما نحجنا بالمعارض التلاتة يلي نظمناهم وحاليا ناطرين نجاح المعرض الرابع يلي اطلقناه تحت اسم *معرض جديد، طاقة جديدة* ، ويلي رح يقام بتواريخ ٤/٥/٦ من شهر نيسان ٢٠٢٥ بحديقة الملك فهد .
المعرض ببساطة هو مساحة لكل شخص عنده موهبة أو مشروع صغير وبدّه يفرجي شغله للناس. رح يكون عنا تشكيلة كبيرة من المشاركين، من مصممين إكسسوارات وأزياء، لأشخاص بيعملوا منتجات طبيعية، لأصحاب مشاريع غذائية وحلويات منزلية. رح يكون في طاقة حلوة، إبداع، وأكيد فرصة لكل حدا يوسع دائرة زبائنه.
من هي الجهات الراعية؟
عنا أكتر من جهة داعمة، من شركات خاصة لمؤسسات مهتمة بدعم المشاريع الصغيرة، وطبعًا في دعم إعلامي قوي لأنه هدفنا نوصل لأكبر عدد ممكن من الناس. الفكرة إنه كل ما زاد الدعم، كل ما قدرنا نعطي فرص أكتر للمشاركين.
ماهي أهداف المعرض؟ ومن هم المشاركين؟
الهدف الأساسي إنه نفتح المجال لأصحاب المشاريع الصغيرة، وخاصة السيدات، ليلاقوا منصة حقيقية يبيعوا فيها شغلهم ويتعرفوا على زبائن جدد. المشاركين هني ناس تعبوا على حالهم وعلى مشاريعهم، وبدّن فرصة ليكملوا بهالشغف.
لماذا نظمتِ معارض متتالية ضمن فترة قصيرة؟
لأنه عنجد في حاجة! كل مرة بعمل معرض بلاقي ناس أكتر عم يسألوا إمتى المعرض الجاي، وعارضين جداد بدهن يشاركوا. فقلت، ليه لا؟ طالما في طلب، وفي ناس عم تستفيد، خلي الحركة مستمرة! غير هيك، كل معرض بيتطور أكتر عن اللي قبله، وعم نخلق مجتمع صغير داعم لبعضه.
هل سيذهب جزء من الريع لجهة معينة، أم أن الهدف تسويقي بحت؟
بصراحة، الفكرة الأساسية إنه نعطي فرصة تسويقية للمشاركين، بس حسب الظروف، أحيانًا منخصص جزء لدعم قضايا معينة أو جمعيات بحاجة لمساعدة. بالنسبة إلي، دعم أصحاب المشاريع الصغيرة بحد ذاته رسالة، لأنه هني كمان عم يخلقوا فرص عمل لأنفسهم ولغيرهم.
شو بتحلم رغدة الصوفي؟ ولوين بدها توصل؟
بحلم يكون عندي منصة دائمة مش بس معارض مؤقتة، يعني مكان أو حتى مشروع إلكتروني بيساعد أصحاب المشاريع الصغيرة يتوسعوا أكتر. بدي كل شخص عنده موهبة أو فكرة يكون عنده فرصة حقيقية للنجاح. الحلم كبير، بس كل خطوة عم نعملها بتقربنا..
بقلم رشيد الخطيب
